fbpx

相信大家一定經歷過電視送飯嘅年代!由20世紀中開始,電視機已經成為我哋娛樂嘅主要途徑。今時今日,電視機已經由奢侈品,變做家家戶戶都會擁有一部嘅必需品。雖然依家電視嘅吸引力可能比唔上電腦或者手機,但如果屋企少咗部電視,硬係會覺得差啲野咁!

雖然係咁,但你又講唔講得出電視機係邊個發明?

自從發明咗電報,可以成功傳送文字之後,世界各地超過50位發明家都紛紛嘗試傳送圖像,發明電視機,等我介紹當中幾個有代表性嘅「電視機之父」比你知啦!

1925年,英國電器工程師John Logie Baird成功發明咗人類學史上第一部電視機!可惜,依部機械式嘅黑白電視機影像模糊不清,而且觀看時會產生好大噪音,令電視未能普及。


▲John Logie Baird發明咗史上第一部電視機,係當年一大突破

兩年後,農村長大嘅Philo Taylor Farnsworth受到田中嘅犁地啟發,首次以電子掃描傳送影像,成功發明電子電視機。比起Baird發明嘅機械電視,電子電視嘅影像更清晰,影片播放度亦更流暢,因此更受大眾歡迎。

▲Philo Taylor Farnsworth發明以電子掃瞄嘅電視機,當時只係22歲嘅佢已經成為「電視機之父」,被譽為係現代電視嘅先驅

可惜,Farnswort發明電視機之後未有即時申請專利,因此,美國無線電公司(RCA)工程師Vladimir Zworykin 就當時負責主要轄心光電攝像管(iconoscope tube)一事,亦自稱「電視機之父」,並就電視發明申請專利,令佢同Farnswort為爭奪電視機嘅專利權打咗一輪官司。雖然Farnswort喺1935年最終獲得勝訴,但打官司已經令佢耗盡財產,而美國無線電公司繼續大肆宣傳「自家設計」嘅電子電視機。

▲Vladimir Zworykin以及光電攝像管(iconoscope tube)

不過你知啦,得黑白嘅電視又點夠好睇呢?大家都希望可以為黑白電視帶來啲突破!

1941年Baird第一次成功傳送彩色圖像。五年後,佢終於成功以彩色電視傳播影像。1951年,彩色電視進行試播,當時首播嘅就係「第二次世界大戰勝利大遊行」啦!不過好可惜,Baird因為抱病,未能親眼目睹彩色電視首播,更喺短短六日之後因病逝世……

▲John Logie Baird發明嘅電視螢幕上,以彩色顯示女飛行員Paddy Naismith的影像

科技日新月異,除咗追求影像之外,電視機都要追求愈嚟愈薄。因此,笨重嘅電視機慢慢被淘汰,取而代之嘅係更輕更薄嘅等離子電視同LCD/LED液晶電視!

等離子電視同LCD/LED液晶電視外型差唔多,不過液晶電視比較節能環保,而且外形更薄、重量較輕,再配合商人嘅銷售策略,液晶電視嘅形象大受歡迎,令等離子電視慢慢淡出,2014年,Samsung宣布停止生產等離子電視。現時市場上我地見到嘅大部分電視,都係LED液晶電視嚟㗎!

▲大家對電視嘅追求愈來愈高,除咗普通液晶電視之外,仲有高清電視、智能電視等…

等離子電視同液晶電視雖然聽落好似好高科技,但其實早喺1964,Donald Bitzer同Gene Slottow兩位教授已經發明左等離子電視架啦!不過,由於技術有限,設計未完善,所以過咗好多年之後先開始普及。而1964年同1977年,George Heilmeier同J.P.Mitchell亦曾經發明LCD電視同LED液晶電視,經過多年嚟一眾發明家不斷改善,先演變成我哋依家睇緊又薄、又高清嘅液晶電視!

電視可以話係陪住我地長大,令我哋嘅生活生色不少。除咗要多謝「電視機之父」John Logie Baird同Philo Farnsworth之外,仲要多謝埋一眾合作嘅發明家,多謝佢哋,我哋先可以一齊享受睇電視嘅樂趣!記住佢哋,以後如果再有人問你電視機係邊個發明,記得要識答啦!

相關文章:

【世上第一個網站係咩樣?html發展歷程!】
【黑膠機未出現之前,留聲機嘅歷史你又知幾多?】
【舊時嘅Call機歷史你知道無?】
【AI界無人不曉嘅Jeff Dean?】