fbpx

對唔少人黎講,喺健身房跑步係一種折磨。但係你又知唔知,原來跑步機最初嘅設計原意,真係用黎折磨人㗎!

19年代初期,當時英國囚犯經常被囚禁喺一個衛生情況欠佳嘅牢房入面,而且慣被處以死刑同驅逐出境作為懲處,監獄體制強差人意。因此,當時熱心嘅宗教團體連同一眾名人決定發起人權運動,為獄中嘅囚犯爭取權益。終於,人權運動成功,監獄得以改革,重新訂製刑罰,跑步機亦都因而引入,成為新嘅懲處工具!

1818年,William Cubitt發明咗跑步機嘅雛形。佢係一個長形嘅滾輪,滾輪上有24條橫軸,當滾輪轉動時,除咗可以強逼囚犯一直踏步,消耗佢哋嘅體力之餘,仲可以打水或磨穀、推動經濟,因此,英國開始引入更多跑步機,以懲罰囚犯!


▲跑步機成為監獄入面嘅新懲處工具,囚犯必須一直踏步,先可以避免跌落,就好似我哋依家嘅跑步機咁

當時,英國超過50座監獄都引進咗跑步機,並規定犯人每星期必須有五日時間要喺跑步機上踏步最少六個鐘。幻想唔到跑六個鐘即係幾多?簡單嚟講,佢哋每日跑嘅距離都同半個珠穆朗瑪峰相約!而且,由於監獄入面膳食有限,導致監犯好容易營養不良,所以佢哋好多都被折磨到身心受創……

雖然依個懲處工具好唔人道,但係對於國家嚟講,跑步機除咗可以懲罰囚犯之外,仲可以打水磨穀等,推動經濟,簡直就係一石二鳥嘅方案,於是,引嚟好多國家仿效,紛紛將跑步機引進國內。直至1898年,英國嘅監獄法 (Prison Act) 先廢除咗依個殘忍嘅刑罰。

1911年,有人為跑步機申請咗專利,跑步機捲土重來。不過今次,佢唔再成為懲處工具,外形亦唔再係長型滾輪,而係用一條可以圍住幾個滾輪轉動嘅履帶,模仿我哋喺平地上跑步嘅體驗,被商業化包裝成一種健身鍛鍊工具。

1952年,華盛頓大學嘅心臟病專家Dr. Robert Bruce同Wayne Quinton首次將跑步機應用係醫學上面,寫出Bruce Protocol去測試心臟最大負荷,從而檢查心肺耐力。喺眾多測試當中,有過八成測試都係採用Bruce Protocol,可見醫學上嘅重要性,跑步機愈來愈被廣泛使用。

Dr. Robert Bruce以及佢所研究嘅Bruce Protocol數據

後來,1960至1970年代間,唔少人開始關注健康,引起一波健身潮,越來越多人希望喺屋企或者健身房做帶氧運動,市場對跑步機嘅需求越嚟越大,跑步機亦都越嚟越普及。隨住科技進步,跑步機嘅外型同功能亦都都慢慢被改良,依家甚至有LCD觸控螢幕嘅跑步機添!跑步除咗可以鍛鍊身體之外,有啲人仲好享受跑步添!。

對你黎講,今時今日嘅跑步機對你嚟講,佢仲係一個折磨用道具定係已經轉化為享受呢?

 

相關文章:

【電視機發展嘅關鍵人物?】
【帶你看盡50年滑鼠進化史!】
【舊時嘅Call機歷史你知道無?】
【世上第一個網站係咩樣?html發展歷程!】