fbpx

我哋平日探熱多數會探額頭或者耳仔,但如果想準確少少嘅話,就需要探埋肛門,量度核心體溫。

有啲人可能都會知道,持續測量核心體溫唔單止可以令醫生更了解我哋嘅生理時鐘,從而推測女性排卵週記、運動員疲累指數等,更可以比患者喺患病初期發現各種症狀,對睡眠障礙、抑鬱依啲疾病嘅診斷都好有幫助,不過,若然要透過肛探依個咁唔舒服嘅方法先量到核心體溫,就令人十分卻步啦!

最近,日本東北大學 中村力教授 同佢嘅研究團隊為咗令探熱更準確同穩定,成功開發咗依個體型細過一毫銀仔,仲可以吞落肚嘅微型電子體溫計,幫助量度核心體溫!


▲中村力教授研究團隊成功開發可供吞服嘅微型電子體溫計

依個體溫計直徑9毫米、厚7毫米,同我哋平時病咗食開嘅藥差唔多大。入面除咗有溫度感應器之外,仲有微型計數機、無線通訊晶片、電池部件同電容器,真係麻雀雖小,五臟俱全㗎!

 

▲體型細小嘅體溫計其實係由眾多電子零件所組成

 

運作方面,體溫計一旦到達胃部,我哋嘅胃酸就會令體溫計入面嘅Mg (Magnesium) 同Pt (Platinum) 嘅電極產生反應,製造電力!

簡單嚟講,就好似檸檬電池咁,我哋嘅胃酸可以幫依個體溫計充電。唔好睇少自己啊,依個電量其實足以負荷體溫計量10至20次體溫。大概每30至60分鐘,體溫計就會自動量一次體溫,並以無線通訊將體溫數據傳送到接收器,過程中並唔會干擾人體基本運作嘅,大家都可以放心!

用家只要臨訓前將體溫計好似食藥咁吞落肚,體溫計就會自己運作,並會喺大約24小時後被自然排出體外,當中並唔會含有任何對人體造成傷害嘅物質。而且,體溫計被人體排出之後,仲可以喺污水處理廠被自然回收同分解添,所以都唔會污染我哋嘅環境㗎!

呢項研究目前已經通過咗動物測試,研究團隊希望可以喺三年內同醫院合作,做埋臨床測試,咁就可以正式打入市場!


▲當天線靠近吞食咗體溫計嘅狗狗,就能即時收到狗狗嘅體溫數據

 

暫時,一個微型體溫計索價1萬日圓(約港幣700蚊),但係研究人員表示其實依種體溫計嘅零件同組裝成本都唔高,如果大量生產嘅話有望可以將一個體溫計嘅價錢控制係100日圓(約港幣7蚊)之內!

假設,將來真係以咁低廉嘅價錢推出市場,你又會唔會每日吞一粒落肚,堅持每日量體溫呢?

 

相關文章:
【AI app預測到你有幾長命?】
【3D列印有望打造出仿生眼?】
【世上首張3D彩色X光片面世?】
【16歲少女研發AI App,快速診斷眼病!】