fbpx

記唔記得我哋曾經考過你分唔分到真人同埋虛擬模特兒? (嚟,我哋一齊回顧下),唔知今次你又估唔估到依個係咪真嘅機械人呢?

依個高科技機械人Boris喺俄羅斯雅羅斯拉夫市 (Yaroslavl) 嘅一個青年科技論壇入面受到全場觸目,因為佢唔單止對答如流,跳舞仲跳得好靈活添!

眼見機械人Boris咁犀利,俄羅斯國營電視台 Russia – 24即刻邀請佢上節目做訪問,睇下佢咁似真人嘅背後到底會唔會收埋咗咩祕密!

喺節目入面,Boris一入場就已經好識做,識得自己同主持握手,又同觀眾打招呼,好識帶動氣氛!


▲Boris肢體活動靈活,並懂得帶動氣氛,吸引一眾目光

不過,憑住好多蛛絲馬跡,網民好快就發現依個機械人好似有啲唔妥,於是強大嘅網民決定起佢底!

網站「TJournal」質疑Boris冇外置感應器,唔似機械人。其後,Boris接受訪問時,亦有媒體影到機械人頸部同身體嘅接駁位竟然露出一截人類皮膚?唔係啊嘛…真人黎嘅喂!


▲Boris接受訪問時,機械人頸部同身體之間接駁位竟然露出人類頸部,惹人懷疑

果然世事都被網民看透,原來Boris係由真人著上一套價值3萬港元嘅機械人道具衫裝扮而成,依套道具服係由Show Robots製造,道具服備有收音咪同平板顯示器,宣稱可以打造一個好似真嘅機械人企喺你面前嘅感覺……


其實,Boris已經唔係第一個聘請真人嚟扮AI嘅例子啦,眼見依家科技發展迅速,好多公司都希望可以打住AI / 自動化嘅旗號,吸引更多投資者。於是,令到好多公司為咗加強產品競爭力,不惜聘請一班員工嚟扮AI,希望取得更多生意……

2008年,一間主打可以將語音訊息轉成文字嘅公司Spinvox就比人揭發,原來係聘請一班真人員工喺到工作。程式並唔係好似宣稱咁智能,而係好原始咁樣,透過真人聽取語音訊息之後再將佢哋轉化為文字。

2016年,新創公司X.ai推出智能助理Amy,聲稱可以透過系統,自動幫用戶安排日程表、發送email等簡單辦公事務。但係,背後卻被揭發原來依啲都係由24小時輪班嘅真人員工所做,為達到好似營造出AI系統嘅效果,員工必須長時間負責一啲單調乏味嘅工作,真係難為員工啦……

新創公司X.ai曾被爆出聘請大量真人模仿AI系統

好多公司對外大肆宣傳自主研發嘅AI系統,希望獲得投資者嘅青睞,為咗跳過眾多艱辛嘅AI研發過程,背後竟然聘請大量廉價勞工完成某啲工作,令小編諗起美國血液檢測公司Theranos,雖然可以募集到巨額嘅營運資金,但當謊言被識破之後,最終都走上咗滅亡之路……

 

相關文章:

【機器學習嘅有趣應用?】
【AI監視器幫手捉賊仔! 】
【AI app預測到你有幾長命?】
【16歲少女研發AI App,快速診斷眼病!】