fbpx

私隱問題一直都係大家熱烈關注嘅話題,不時聽到一啲企業系統遭入侵,用戶資料被洩漏,令人擔心網絡私隱安全問題。就好似前一排,Instagram出現安全漏洞,令用戶密碼被暴露。所以,好多網站都會提醒大家要定期換密碼,但係,你哋又有冇照做呢?

有見資料外洩事故頻繁,以及大家對私隱問題嘅關注,近日,Google就推出咗新嘅Chrome瀏覽器擴充功能「Password Checkup」,當自動偵測到你所用嘅帳號密碼外洩時,就會主動通知你,叫你盡快更改密碼!

 


▲Google推出Chrome瀏覽器擴充功能「Password Checkup」,協助用戶減低資料外洩問題

「Password Checkup」用法十分簡單,當用戶下載並啟動之後,擴充功能就會自動運作。每當用戶於任何網站輸入登入帳號及密碼,Password Checkup就會自動拎佢同Google超過40億個已知嘅外洩資料作對比,一但發現用戶帳號出現安全隱憂,就會即刻傳送警告比你,提示你要盡快更改密碼!


▲「Password Checkup」用法簡單,只需幾步便可以幫你偵測帳號是否存在安全疑慮

不過你可能會驚,會唔會安裝咗依個擴充功能之後,反而更危險,會唔會比Google盜取晒平時瀏覽網站嘅帳號資料㗎?

大家可以放心,Google發布時已經就依方面作出解釋,設計「Password Checkup」時已經將隱私權納入考慮因素,依個功能利用多個密碼學技術,包括Multiple round hashing、K-anonymity、Blinding 等等,保障傳送資料嘅過程唔會洩漏資料,大家唔洗過分擔心!

此外,依個功能只會發表匿名報告,唔會透露任何用戶嘅帳號、密碼或者係其他個人識別嘅資訊等,所以都幾安全㗎!

目前,「Password Checkup」已經開放下載,Chrome瀏覽器嘅用家可以透過Chrome web store 下載依個擴充功能,當你將佢加到Chrome瀏覽器後,功能就會自動啟用㗎啦!係咪好簡單呢,啱晒平日唔肯定期換密碼,係要等密碼被外洩時先捨得換嘅你啦!

 

由於Google將會持續改善擴充功能,提升唔同網站嘅相容性同偵測能力,令用戶更有效地知道自己嘅帳號密碼有冇外洩,所以如果想更有效地保護自己個帳號,記得定期更新啦!

 

最後,送多幾個保障自己嘅改密碼貼士比你哋,改密碼時可以參考下:

1)密碼要愈長愈好
比起複雜度,密碼嘅長度更重要!密碼愈長,當中嘅組合亦都會更多,可以增強被撞破嘅難度㗎

2)唔好再用常用字詞/貪方便嘅密碼
根據國際網路安全公司嘅調查,「123456」,「111111」、「qwerty」、「password」等都係最常用嘅密碼,可常而知有幾危險,一撞就中㗎啦!
(小編都係用緊123456嚟做密碼……即刻去改先!)

3)唔好用個人資料作為密碼
要拎到英文名、生日日期、電話號碼等依啲個人資料,對於駭客嚟講可以話係輕而易舉。雖然易記,但都係改咗佢好啲!

不過,除上以上貼士之外,最緊要其實都係要記得定期換密碼,咁先可以保護到自己帳號㗎!

 

Cr: Google Chrome

 

相關文章:

【不同口音的Google翻譯?】
【透過指尖可分析喜怒哀樂?】
【AI監視器幫手捉賊仔! 】
【世上第一個網站係咩樣?html發展歷程!】