fbpx

近日《Captain Marvel》成為城中熱話,除咗因為《Avengers 4: Endgame》就快上映之外,今次仲係Marvel電影系列中第一套由女性主演嘅英雄片嚟,相信一班Marvel迷都已經迫不及待,即刻睇咗啦!

《Captain Marvel》嘅故事背景定於1990年代,為咗令影迷可以更投入喺電影裹面,Marvel專程模仿 90 年代網站嘅設計風格,整咗一個懷舊嘅網站嚟宣傳。因為依個有趣嘅宣傳方法,令大家喺投入電影嘅同時,不禁回憶起以往上網嘅時光。


▲Captain Marvel網站嘅主頁係咪好懷舊,有種當年上網嘅感覺呢!

依個網站設立咗好多互動位置等大家去發掘!例如瀏覽網站嘅時候會發現由Skrull種族扮演嘅婆婆老是常出現,而大家仲可以透過滑鼠點擊嚟毆打婆婆,十分抵死,就好似重現返預告片已經出現過嘅「打啊婆情節」咁,令人忍俊不禁。

網頁當中亦設有小遊戲,大家可以測試下自己究竟分唔分辨到佢係人類,定係可以隨時轉型態扮人類嘅Skrull族,相當有趣㗎!

而且,網站上仲有多媒體影畫廊!除咗可以睇到Captain Marvel嘅劇照之外,當中嘅Windows Media Player仲真係work到㗎!你可以用依個超細嘅Media Player播放Captain Marvel嘅預告片!

講起懷舊網站,唔知你哋記唔記得以前好多網站最後都會有Guestbook一欄呢?依個Guestbook就好似留言板咁,比訪客可以留個言,交流下咁。Captain Marvel網站亦加入咗依個部分,只要細心留意,你就會發現依啲留言其實都好別出心裁㗎! “All your base”同 “dancing baby” 都係90年代係網上好流行嘅meme嚟,成個網站扮90年代真係扮得好足!

不過就好似以下網民所講,如果網站中所有相都要load好耐,又或者啲片需要係咁緩衝嘅話就更加正啦!講起90年代嘅網站,點可以見唔到「死圖」?為咗還原返當年上網不斷等待嘅感覺,Captain Marvel網站上仲特別上載咗一張「死圖」,大家可以重新感受下當年load極都load唔到張圖嘅感覺!

講咗咁耐,係時候自己體驗下啦!Captain Marvel 網站

網站誇張嘅背景、文字藝術師咁樣嘅字體、低清嘅gif、大大粒嘅灰色制……係咪完全重現咗90年代嘅感覺呢?(都係果句啦,小編好後生,都係聽人講㗎咋,未上過90年代嘅網…)不過暴露年齡都要問㗎啦,唔知有接觸設計嘅你,又講唔講得出依個網站用咗邊個設計軟件?

.

.

.

冇錯!就係Microsoft Office Frontpage啦!1995年由Microsoft推出,專門比用戶設計網站。因為簡單易用,所以吸引咗好多初學者使用,但係又由於佢嘅功能限制,未能夠製作專業嘅網站,所以喺2006年,就被其他Microsoft嘅其他軟件淘汰,所以,Microsoft Office Frontpage真係時代嘅眼淚嚟㗎……

講完設計軟件,不如又講下伺服器啦!Capital Marvel網站用咗90年代好多人用嘅AngelFire伺服器。Angelfire喺1996年開發嘅,主要功能係比你寫Blog同整相簿咁,有分免費版同付費版。

相信就咁睇個網站都已經感受到Angelfire係上世紀嘅產物啦!依家仲用緊Angelfire伺服器嘅網站其實真係少之又少啦,所以小編都精心準備咗幾個網站比年輕嘅你哋感受一下:

http://www.angelfire.com/co/cisco/

http://www.angelfire.com/ny4/BungalowBill/

http://www.angelfire.com/indie/clergy/

 

 

唔知Captain Marvel呢個宣傳可唔可以成功吸引到你入戲院睇佢套戲呢?

小編就覺得呢個宣傳點都係幾成功嘅,至少吸引到小編玩咗好耐,依家仲寫埋篇blog介紹添!

不過點都好,你哋望完個網站記得話比我哋知你最掛住嘅係邊個懷舊元素啊!

 

Cr: Captain Marvel

 

相關文章:

【世上第一個網站係咩樣?html發展歷程!】
【將「Her」搬到現實,人類同電腦發展出戀情?】
【舊時嘅Call機歷史你知道無?】
【帶你看盡50年滑鼠進化史!】