fbpx

講到近幾年最受歡迎嘅遊戲,又點少得PUBG、Fortnite同Apex Legends呢?呢類大逃殺遊戲同傳統戰地遊戲唔同,遊戲一開始,玩家要同其他99人搭同一架飛機,玩家揀定落地區域之後,喺蒐集求生物資嘅同時,仲要同其他玩家搏鬥。與此同時,安全嘅活動範圍亦會越縮越細,玩家要繼續廝殺落去,直至得返最後一隊甚至最後一個玩家先可以獲勝。



想親身體驗普通戰地遊戲,我哋可以玩各式各樣嘅War game;但至於想將Battle Royale類型遊戲搬到現實,就唔係咁容易啦!

活動開始前,首先要將物資包括頭盔、保護衣、槍械、子彈、藥包、手榴彈等,分散喺島嶼嘅唔同地方,甚至角落;遊戲途中,仲會有空投或者炸彈從天而降;講到最麻煩嘅,仲要收細安全區,姐係玩家講嘅縮圈!依啲都好要好大規模,成個活動要大製作先可以還原到!

其實,網上都有唔少人嘗試過用唔同方法,務求塑造一個貼近遊戲嘅真實體驗,就好似Youtube有41,000,000訂閱嘅Dude Perfect咁,由PUBG MOBILE贊助,搞咗一場真實版Battle Royale,當中好多細節,例如空投同埋吉利服等,還原度都好高;不過,我哋都可以見到呢個真人版有唔少不足嘅地方, 例如代表血量嘅氣球好容易被叢林嘅樹枝整爆,莫名扣血,同時亦好容易令玩家行蹤暴露咁……


好似上面咁講,要塑造一個還原度高嘅Battle Royale遊戲體驗,需要動用好多人力同物力先可以做到。

近日,有一位匿名嘅富豪就喺奢侈購物網站、被譽為「富豪版Amazon」嘅Hush Hush到發佈咗一則貼文,希望以£1500歐羅一日 (約港幣$13,000)、£45000歐羅六星期(約港幣$400,000)嘅高薪聘請一位遊戲設計師,幫手安排一場有100名參加者嘅真人版Battle Royale活動,吸引咗好多人嘅目光 (如果你都具備舉辦大活動嘅經驗,又識得設計場地,不妨望下喎!)


Hush Hush嘅創辦人Aaron Harpin指出,依位富豪係Battle Royale嘅超級fans,為咗令參加者有最真實嘅體驗,佢已經計劃為依個遊戲認購一個私人島嶼,喺島嶼上面進行依個活動。當所有詳情落實之後,Hush Hush就會開始招募參加者。所有參加者將會有氣槍、子彈、感應保護衣等裝備。

依個真人版Battle Royale預計會係今年冬天舉行,大概會維持3日、每日12個鐘,其餘時間就可以自由活動。夜晚位參加者就要喺當地露營,不過放心,食物、營具等必需品會由大會提供嘅!


話晒依個都係廝殺遊戲,同玩家喺叢林搏鬥嘅過程中難免會受傷,所以,主辦單位都好關心參加者嘅安全,活動全程都會安排醫生等專家駐場,當以免發生危險。而最後生存嘅勝利者將會贏取£100,000歐羅(約港幣$880,000)嘅大獎添!呢位富豪更加宣稱如果呢個活動成功舉行,將會變成一年一度,唔知大家又有冇興趣?不過喺真人版入面,玩家已經唔單止需要良好嘅手眼協調,依個遊戲對體力、戰術等等都有一定嘅需求,如果有機會,你又會唔會想挑戰下自己呢?

Cr: Hush Hush