fbpx

大家上網或者睇雜誌嘅時候,係咪經常都會發現啲模特兒「樣靚身材正」呢?雖然知道佢哋啲相都係經過處理,但你有冇諗過,有啲竟然直程係由電腦合成嘅假人,由頭到尾都係假,係一名虛擬嘅模特兒?


唔敢相信電腦合成技術可以呃到你對眼?依幾個模特兒當中,只有一個係真實存在嘅真人,睇下你又分唔分得出啦!

 

----

估到未呢?

3

2

1

開估啦!

 

係咁多位模特兒入面,只有Viktoria Odintsova (右下) 係真人,而其餘三位都係由電腦合成技術所創造嘅虛擬角色,等我為你介紹下啦!

 

Shudu Gram係全球首位數碼超模 (Digital Supermodel),由英國攝影師Cameron-James‭ ‬Williams花十年時間創造出嚟。擁有深棕膚色以及豐滿雙唇,再配上高瘦苗條嘅身材,令佢Instagram擁有157.5K 粉絲。

▲Shudu Gram 亦經常為各大品牌代言廣告並出席品牌活動,就好似真實模特兒咁

Lil Miquela 係由洛彬機嘅初創公司Brud創造。佢除咗係一名模特兒之外,亦都係一名音樂人,喺Instagram坐擁過150萬名粉絲。除此之外佢仲曾經同Donald Trump、Rihanna一同入選《TIME》年度「網絡最具影響力人士」添,可想而知,虛擬模特兒嘅影響力都唔細㗎!

虛擬嘅模特兒Miquela 經常穿著Supreme、Off-White、CHANEL、Balenciaga等名牌出席活動,擁有敏銳時尚觸覺嘅佢經常喺Instagram中分享自拍同穿搭,一眾時裝品牌都爭先搵佢合作,令佢成為各大時裝雜誌嘅常客!

除咗品牌代言之外,佢嘅人脈網絡亦四通八達,同潮流界風雲人物十分之熟稔,Instargram上仲發佈過同澳洲人氣Blogger章凝 一齊食飯嘅合照添!此外、佢仲會回覆大家嘅留言,同粉絲進行互動,亦會跟上現時最流行嘅話題,之前亦有為大家議論紛紛嘅美國槍械管制發表自己嘅意見。

Miquela無論係外表、衣著打扮定係Lifestyle等,都同我哋一般睇開嘅KOL毫無分別,而依個亦係設計師想帶出嘅訊息,平日我哋Instagram上見到嘅野,究竟有幾多係真實嘅呢?

 

另一位模特兒,Imma 擁有搶眼嘅粉紅色短髮,精緻嘅五官,配上粉嫩妝容,不時喺Instagram及Twitter上分享穿街拍相片,引來大量粉絲追蹤,但其實,佢都係由電腦合成嘅虛擬模特兒嚟,由日本3D電腦動畫公司ModelingCafe所創造!

▲Imma不時在網上分享街拍,逼真嘅樣貌加上時尚嘅穿搭引來大量粉絲追蹤

 

其實喺依三位虛擬模特兒大捲潮流界之前,早喺2012年,Prada都曾經同角色扮演遊戲最終幻想(Final Fantasy) 中嘅虛擬角色合作,推出一系列嘅春季運動服裝。

而2016年,時裝品牌Louis Vuitton (LV) 認為Final Fantasy中嘅虛擬角色Lighting女中豪傑嘅形象好適合LV品牌中新時代嘅理念,因此決定同游戲公司合作,聘請Lighting成為廣告代言人。

▲在時裝品牌Louis Vuitton廣告中,虛擬角色Lighting穿上LV春夏新裝示人。

 

而近日,法國時裝品牌Balmain喺新系列中,亦聘用咗三名虛擬模特兒,並稱佢哋為「巴爾曼軍團」,先用3D繪圖設計人物,再同虛擬時尚企業CLO合作,將衣服資料包括衣服重量、彈性、皺褶細節等匯入電腦之後,依啲程式就可以幫依啲模特兒著上品牌嘅新衫啦!

▲啱啱介紹過嘅Shudu (中)、Margot (左) 同 Zhi (右) 三位虛擬模特兒係時裝品牌Balmain嘅新面孔

 


 

依家,好多唔同公司都塑造緊唔同樣貌,甚至唔同種族嘅虛擬模特兒,而依個趨勢都引嚟唔少反對嘅聲音,有人擔心虛擬模特兒會漸漸取代真人模特兒,令模特兒界嘅競爭更加激烈。同時,由於公司可以設計大量天使面孔,魔鬼身材嘅模特兒,設計到佢哋外貌同身材都近乎「完美」,有人亦擔心會造成更嚴苛嘅標準,令社會盲目跟隨或追捧,唔知,你又覺得點呢?